Kaibigang Tunay

Noong ako’y bata pa, aking ninasa
Tunay na kaibigan ay makakilala
Nang makasama sa hirap at ginhawa

Ako ay naglakbay ng malayo-layo
Ginamit ang lakas pati ang oras ko
Upang siya’y hanapi’t makita ko

Ngayon ngang ako’y matanda’t may isip na
Tunay na kaibiga’y natagpuan na
At kami’y hindi na maghihiwalay pa

Binigyan niya ako ng inspirasyon
Upang tuparin ko’ng aking mga misyon
Sa buhay, sa lahat ng aking panahon

Sa akin siya ay nagbigay ng tuwa
Tinuruan akong laging maging handa
Kabutihang asal n’ya’y kahanga-hanga

Itong tula, sayo’y aking inaalay
Sana’y ganyan ka palagi, kasangbahay
Ika’y naging halimbawa ko sa buhay

Oh, kaibigan kong tapat at totoo
Sa hirap ay asahan mo rin nga ako
Kung kaya ko’y lagi akong sasaklolo

At sa saya ay sasamahan din kita
Hinding-hindi ka maiiwang mag-isa
Sa akin nga sana ay magtiwala ka

Sa ‘di nakikita lang tayo tumingin
Magdalahan tayo ng ating pasanin
Tungkulin ay sabay nating tatapusin